Andromache

السلام عليكم اختي في الله

شفاكي الله وعفاكي بامره وفضله
شايفه ان العوامل النفسيه مأثرة اكتر من غيرها رغم ان مازال سيطرة على القرين وشوية حاجات ان شاء الله يكون بفضل الله الخلاص منها
لازم قبل اي حاجه تتخلصي من الهواجس النفسيه لانها بتنسف العلاج
من قبل رمضان ولحد فترة قريبه يمكن اخر شهر محرم وكانت الاستنزالات والحروب الباطنيه شغاله ويمكن احساسك بالتعب المستمر والاحلام الملغبطه والارهاق من اسبابها والله اعلم .
على فكرة ..اغلب التجديدات كانت من الجن نفسه
هنمشي في طريقين ...عشان نخلص من التأكيل اللي حصل في المنام وعشان نرجع القرين ونسيطر عليه ..لان القرين مش موجود متسيطر عليه .
هنورد سورة ق كل يوم ٣ مرات مع طبعا الاذكار واوراد بعد كل فريضه وتاج الذكر ١٠٠ ص. زيهم مساءا
هتجيبي ازازة مية كبيره مليانه وهتقري عليها سورة البقرة كامله وسورة الصافات ٣ مرات ..الكافرون ٧ مرات الاخلاص ٧ مرات الفلق والناس كل واحده ٧ مرات ..
ـ قبل القراءة هتقري البسمله ١٩مرة الصلاة الابراهيميه ١٩مرة وتختمي بالصلاة على رسول الله مرة

الاستعانه بالله دائما وابدا ...الاستعاذه بالله من الشيطان الرجيم ومن نفخه ونفثه وهمزه ..
الطاهرة الدائمه ..النوم على طهاره ..هتشغلي الرقيه في غرفتك الصبح وتكوني فاتحه الشباك ..
هتعملي خلوة مع ربنا كل يوم خمس دقايق هتفصلي دماغك عن اي حاجه ...انت في معية الله عز وجل فقط .
وهكون ان شاء الله في انتظار اي تعقيب او استفسار .

نور مبين
السلام عليكم اختى الكريمة، يارب تكوني بخير وفي احسن حال
حضرتك اشارتي مره قبل كده في حديثنا للقرين وقولتلي اقرا ق و الرحمن مره كل يوم وانا ملتزمة من يومها ، دلوقتي الرحمن مره و ق ٣ مرات؟
ورد الكافرون ٢١ مره افضل مواظبه عليه؟

• انا بتعرض لضغوط نفسيه من اهلى وببعد عشان اتفدى الضغط النفسي بس مهما بعدت مفيش فايده
دا بالاضافه لأزا الاسحار اللي بتحصل في البيت بالمسح والرش المستمر وانا بحس بيها وفي اوقات اثناء المسح ف نفس اللحظه بحس بتقل في دراعي اليمين وبيفضل مستمر لتاني يوم ..
- كمان الهواجس النفسيه اللي جوايا وسببها احساسي اني محاصره من كيان
بالنسبالي انا مش مفهوم ودايماً حاسه انه متفوق عليا او مع كل محاوله مني لمقاومته بيقدر يحبطني حتى الاحباط ده انا بقاومة على اد مابقدر
ويمكن يكون السبب ف الهواجس الداخليه اني مش فاهمه او مش حاسه بتأثير ايجابي عليا
انا معنديش حل للضغوط النفسيه وانا عارفه انها بتأثر على العلاج وبحس بنفسي بتأخر مش بتقدم!
- فكرت الجئ لطبيب نفسي بس انا عارفه اني هتشخص بحاجات زي الفصام والهلوسه والتوهم! وهيتكتب لي علاجات هتأذيني اكتر
معنديش حل مناسب للنقطه دي وانا عارفه انها يابتأخرني ياموقفاني مكاني!
——————————————-

الاسبوع اللي فات حلمت انا بفتح كفي اليمين وشوفت فيه عين حورس والعين اتحركت واتحولت لصقر وطارت
وكل ما اقفل ايدي وافتحها دا يتكرر تاني

حلم تاني في كفي اليمين شوفت نجمه سداسيه ولما قفلت ايدي وفتحتها ظهر جنبها نجمه تانيه والنجمتين فضلوا يلفوا ف نفس مكانهم

نور مبين
انا اسفه ان الكلام كان عن مشاكل شخصيه وانا عارفه ان حضرتك مفيش في ايدك حاجة في النقطه دي
كنت بحاول اقول لحضرتك ان كلامك صح وانها ضغوط نفسيه وانا عارفه وفكرت فيها من نفس الزاويه اللي حضرتك طرحتيها بس مالقتش لها حل
مكنتش اقصد خالص اصدر لحضرتك طاقه سلبيه او احباط .. معلش انا اسفه
————————————————-
عندي استفسار بخصوص الخلوه اللي حضرتك قولتي اعملها كل يوم ٥ دقايق
مش عارفه اعملها ازاي؟؟! اقعد لوحدي ساكته؟ انا طول الوقت قاعده لوحدي وساكته
هل ينفع اختار ايه بحبها واكررها بالقلب بدون عدد؟
—————————————————-
* تصحيح: الحلمين اللي حكيتهم في نهايه الرد الاخير
الاتنين كانوا في الكف الشمال
انا غلطت وكتبت الكف اليمين

Andromache

السلام عليكم ورحمة الله
مافيش داعي للاعتذار انا حاسه بكي ومقدرة كل اللي انتي فيه ..وان شاء الله هتكوني بخير ..اعرفي انها فترة مهما طالت مدتها فهى بردو هتمر ان شاء الله .كله بقدر ومقدار معين ..وانت مأجورة على كل شيء بتعشيه ..
التزمي بالورد اللي اديتهولك ...بلاش اي زياده عليه رجاءا ...
بخصوص المية المقروء عليها ...هتشربي منها وتمسحي وشك وايديكي واللي تطوله ايدك من جسمك ..تجديد القراءة ان امكن كل ٣ ايام او كل ما الازازه تخلص معاكي ..
الخلوة ...مبدئيا ..اعمليها في اي وقت تحسي ان دماغي عادي مش بيفكر ..حاولي كل مرة تعيشي بس لحظه الذوبان في معية الله وحضوره ..
تقدري طبعا تدربي روحك عليها باي ورد او ايه تحبيها ..المهم انك تبعدي عن تفكيرك اي فكره الا اللحظه اللي انت فيها بين ايدين رب العزة ...
الاحلام معناها ان في طلاسم وان شاء الله ابشرك ان كل ده هيزول ..

احنا في فترة مهمه وتقيله جدا فترة تمحيص واستخلاص ..والله اعلم

حاضر هلتزم بالورد اللي حضرتك قولتي عليه بس.

سؤال اخير معلش اختلط عليا الامر.. افضل مستمره على ورد -الكافرون ٢١ مره واليوم السابع التوبه؟
-سورة ق ٣ مرات . معاها سورة يوسف مره زي ماحضرتك قولتيلي قبل كده؟ ولا اوقف سورة يوسف؟

———
بالنسبه للماء المقروء عليه انا ممكن امشي عليه على طول عادي ، من سنه وانا مابشربش غير ماء مقروء عليه سورة البقره كامله و ٧ مرات (الفاتحة-الكرسي - الكافرون- الصمد - المعوذتين) لو وقفت يوم لاي ظروف او خرجت يوم وطولت بره بحس بطعم مراره شديده في حلقي مفيش حاجة بتقضي عليها غير الماء المقروء عليه
هقرء بالظبط زي ماحضرتك كتبتيلي وهستمر عليه انشاءالله

ورد الكافرون لمدة اسبوع بس وتوقفي الورد بعدها ..
وسورة ق ياريت اذا ينفع تكون الصبح يعني بعد ما تقومي من النوم ..
بليل هتقري سورة النور عشان التحرشات مرة واحده

الميه ...ممتاز كده بس زودي عليها سورة الصافات ٣ مرات وكل مرة هتقري اول ١٠ ايات ٣ مرات وتكملي السورة ..وتكرريهم كل مرة من ال ٣ ..
ده هينضف بطنك عامة من الاكل والشرب وكمان هتمسحي بيها وشك وايديكي
الشرب طول يوم ...فأقري على كميه تكفي مثلا ٣ ايام او اكتر

ربنا يعافيكي ..
عايزه اقولك حاجه ...فرجه قرب ونصره قريب ..وبشر الصابرين .

الحمدلله بدأت من الاسبوع اللي فات بتنفيذ كلام حضرتك ، انشاءالله ملتزمة بيه
من اول اشاره من حضرتك لسورة ق يومين بس قرأتها بالليل بس ماعرفتش انام بعدها ومن وقتها وانا بقرأها بالنهار
انا متشكرة جداً على وقتك واهتمامك ورد
مفيش اي كلام او شكر هيوفيكي حقك
ربنا يجبر بخاطرك ويطمن قلبك.

Andromache
مافيش شكر بين الاخوات ..انا عايزاكي تكوني بخير وفي افضل حال ..وان شاء الله يقينا بالله انك هتكوني بخير وكل ده هينتهي امره قريب بتيسير الله وفضله عليكي ..ابشري ..
وعلى فكرة انا بتعلم هنا كتير والحمد لله وربنا يجعلنا دايما عون لبعض ويجعلنا اسباب في الخير ...

نور مبين
السلام عليكم اختى الكريمة..
محتاجة مساعدة حضرتك
انا ملتزمة بالاوراد زي ماحضرتك اشرتي بالظبط
وقفت ورد الكافرون يوم الجمعة اللي فاتت
وكررت الماء المقروء عليه مره تانيه وفي المره التانيه قرأت الصافات زي حددتيلي ف الرد (١١١)
في المره الاولي ماحستش بتعب في المره التانيه جهزتها يوم الاحد الصبح ونمت بين العصر والمغرب وحلمت اني في واحده ست وابنها (ملامحهم وهيئتهم هيئه الغجر) خبطوا على شقتي وابنها ماسك في ايده ورقع كتير حجمة مربعات صغيره(شبه تذاكر القطر الكارتون القديمة) ومرصوصين في ايده وقالي احنا جايين نمسح شقتك واداني الورق في ايدي
بنت اخويا كانت موجوده في شقتي قولتلها بيقول جايين نمسح!! قالتلي اه عادي واخدت مني الورق
روحت اجيب جردل لقيت مكان الجردل ع الارض مايه بطينه. سألتها الورق ده مكتوب فيه ايه؟ قالتلي ارقام

صحيت من النوم حاسه بوجع في عضم رجلي اليمين وجع شديد مكنتش عارفه امشي كويس
فضل الوجع لحد تاني يوم بعد ما قرأت الورد ماختفاش غير قرأت سورة البقره

النهارده صحيت من النوم عندي صداع في نص وشي اليمين دماغي وعيني وعضم وشي وسناني نفس الصداع اللي كنت بحسه لما كنت بقرأ ورد التوبه
و شوفت حلم كأني في مكان وزمان مختلفين رجاله لبسين لبس محاربين وبيمارسوا الجنس مع بعض

نور مبين
انا تعبانه همدانه حاسه بارهاق و هبوط حاسه كأن عيني طالعة لبره كأن عيني هتقع من وشي، كل يوم بصحي عيني ورمه وبتدمع وفي ايام بتفضل كده طول اليوم
اتعاملت مع التعب على انه تعب عضوي واخدت ادويه ومسكنات بس مابتعملش حاجة
كل حاجة بدأت بالتدريج ومن اول يوم الاحد بالليل والتعب بيزيد

Andromache
السلام عليكم اختي في الله ...
طيب هقولك على حاجه تعمليها دلوقتي وتعرفيني حسيتي ب ايه ..



:::: تصلي ركعتين لله عز وجل بنية فك وابطال كل الاعمال الموكله عليك
تفضلي في اتجاه القبله وتقري الاتي ::
سورة الفاتحة ٣ مرات
سورة القدر ٣مرات
المعوذتين ٣ مرات
اية الكرسي ٣ مرات
و
سورة الشمس سورة القمر سورة النجم
سورة البروج سورة الطارق سورة التكوير

كل سورة مره
بعد كده هتقري ده ثلاث مرات
((بسم الله وبالله بسم الله ما شاء الله بسم الله ولا حول ولا قوة الا بالله قال موسى ماجئتم به السحر ان الله سيبطله ان الله لا يصلح عمل المفسدين فوقع الحق وبطل ما كانوا يعملون فغلبوا هنالك وانقلبوا صاغرين))

وبعد كده غمضي عنيكي وحطي ايدك اليمين على عنيكي وهتكرري ده وانت مغمضه

(( الله نور السماوات والارض ))٧٠ مره

((وقدمنا الى كا عملوا من عمل فجعلناه هباءا منثورا) )٧٠ مره

(( اخرج منها فانك رجيم) ) ٧٠ مره

بعدها عرفيني ايه حصل وقت القراءة ..

نور مبين
عملت زي ماحضرتك قولتي بالظبط
اثناء القراءه كنت بتاوب كتير
ولما وصلت لاخر حاجة (اخرج منها فانك رجيم) حسيت بألم في عيني ، عيني اليمين اكتر
لما خلصت الالم اتحرك وحسيت بحاجة بتتحرك لفوق ودني اليمين و حالياً الالم مستقر في ودني اليمين

Andromache
تمام ...
هتسمي الله وتحوقلي ..وانت ايدك اليمين على مكان الالم ..يعني هتقولي. ..بسم الله ولا حول ولا قوة الا بالله سحبت الالم بالف الف لا حول ولا قوة الا بالله ..٣ مرات وتعملي كأنك بتسحبي الالم بالفعل وبعد كده تنتري ايدك في الهوا ٣ مرات وانت بتقولي الله اكبر ٣ مرات
الورد اللي في ١١٦ ..هتقريه كل يوم لمدة ١٥ يوم متواصل ...كل يوم وياريت بكون بعد العشاء ..
يعني هتصلي الركعتين وتقري السور بنفس الترتيب ..
اعملي البسمله والحوقله وهتلاقي جنود ربنا معاكي بامره وتدبيره ...

نور مبين حاضر
انشاء الله هقرأه من اول النهارده بعد العشاء
وهبلغ حضرتك لو حصل اي حاجة

انا متشكرة جداً على اهتمام حضرتك
ربنا يكرمك ويريح قلبك

Andromache
ربنا يقويكي ويعينك ..ويعجل بالفرج ان شاء الله ..
ما تنسيش الاستغفار باستشعاره في قلبك ..والتفكير الايجابي الله يخليكي ..
ربنا يعافيكي بفضله وكرمه ..